Adroddiad arolygiad Ysgol Llanhari 2025Ysgol sy’n darparu cyfle arbennig i’ch plentyn o 3 i 19 oed, neu i ymuno â ni’n 11 oed o un o’n hysgolion cynradd partner lleol yw Ysgol Llanhari.
Mae Ysgol Llanhari yn ysgol sy’n darparu addysg i ddisgyblion o 3 mlwydd oed hyd at 19 mlwydd oed drwy gyfrwng y Gymraeg. Cymraeg yw iaith addysgu a chymdeithasu’r ysgol ac mae ein cymuned yn seiliedig ar barch a balchder yn ein hiaith, ein diwylliant a’n hunaniaeth.
Sefydlwyd Adran Gynradd yr ysgol ym Medi 2012 gan drawsnewid Ysgol Gyfun Llanhari yn ‘Ysgol Bob Oed’; un ysgol i ddisgyblion o 3 oed i 19 ar un safle, gydag un bwrdd Llywodraethol ac un Tîm Arwain a staff.
Lleolir Cylch Meithrin Camau Cyntaf ar safle’r ysgol hefyd a chydweithiwn â hwy yn y Cyfnod Sylfaen i ddarparu gofal cofleidiol rhan amser i ddisgyblion ieuengaf yr ysgol cyn eu bod yn ymuno ag Ysgol Llanhari’n llawn amser yn y tymor yn dilyn eu penblwydd yn 4 oed. Rhydd hyn gyfle arbennig i ni fel ysgol sicrhau dilyniant a chynnydd i’n disgyblion ar hyd y cyfnodau dysgu a hynny mewn awyrgylch sy’n adlewyrchu’r uned deuluol.
Rhown gyfleoedd i’r disgyblion a’r athrawon gydweithio ar draws y sector gynradd ac uwchradd mewn amgylchedd diogel, trefnus a chydlynus. Cydweithiwn yn agos iawn â’n hysgolion cynradd partner Ysgol Gynradd Dolau, Ysgol Gynradd Gymunedol Gymraeg Llantrisant ac Ysgol Gynradd Gymraeg Tonyrefail er mwyn sicrhau trosglwyddo effeithiol hefyd i bob disgybl newydd sy’n ymuno â’r ysgol ym mlwyddyn 7.
Adroddiad Arolygiad Ysgol Llanhari
Adroddiad arolygiad Ysgol Llanhari 2025
Awdurdod Addysg Lleol Rhondda Cynon Taf sy’n gyfrifol am drefniadau mynediad i’r ysgol. Gallwch gysylltu â hwy ar www.rctcbc.gov.uk/derbyndisgyblion am becyn mynediad.
